Ljetnji picigin: Zeleničani najbolji, puno dječaka i atraktivnih skokova

Na pješčanoj plaži Stara banja u Igalu, pred kratki ljetnji pljusak, danas je održan turnir u piciginu. Brojna publika je uživala u navijanju, a kupači su pokušavali da oponašaju takmičare.

Ekipa “Zeleničke tihe vale” nije imala premca, te je osvojila pobjednički pehar. Članovi pobjedničke ekipe su Lazar Vuksanović, Vladimir Pavlović, Dušan Vulinović, Luka Stanišić i Ivan Matović. U konkurenciji od 12 ekipa, najviše učesnika bilo je iz Zelenike. Drugo mjesto zauzela je ekipa „Porto di Drijenje“, dok su treće mjesto podijelile ekipe „Što’š pit’“ i „Kako bilo”.

Najbolji potez turnira izveo je Lazar Vuksanović, dok je najmlađi učesnik bio 11-godišnji Eldar Hasić iz ekipe „Piciginski majstori“. Najstariji takmičar, 63-godišnji Miroslav Jančić, predstavljao je ekipu „Kukumara”. Organizatore, iz NVO Got, posebno raduje što je bilo mnogo dječaka koji su se trudili da im loptica ne padne u more. Ova autentična lokalna sportska igra ima za cilj zadržati lopticu što duže u vazduhu.

Iz NVO Got najavljuju da će nastojati da ljetnji turniri u piciginu na Staroj banji postanu tradicija, kao što je već uspostavljen zimski turnir u vrijeme “Mimoze”. U februaru iduće godine planiraju obilježavanje desetogodišnjice organizacije.