Osaka nakon ranog poraza: Teško je uskladiti majčinstvo i vrhunski tenis

Japanska teniserka Naomi Osaka završila je nastup na turniru u Majamiju već u prvom kolu, nakon što je poražena od Australijanke Talije Gibson rezultatom 7:5, 6:4. Ipak, više od samog rezultata u prvi plan dospjela je njena borba da uskladi profesionalnu karijeru i majčinstvo.

Nekada najbolja igračica svijeta i dalje traži pravi ritam nakon povratka na teren poslije pauze zbog rođenja ćerke. Iako je prošle godine nagovijestila povratak u vrh plasmanom u završnicu US Opena, Osaka još uvijek ne uspijeva da veže zapaženije rezultate. Nedavno je zaustavljena od prve teniserke svijeta Arine Sabaljenke na turniru u Indijan Velsu, a sada je uslijedio i rani oproštaj u Majamiju.

Osaka je istakla da joj je porodica prioritet, ali da istovremeno želi da ponovo bude među najboljima. Upravo zbog toga pažljivo planira nastupe, svjesna da svaki turnir znači i odvajanje od vremena koje želi da provede sa ćerkom. Zbog takvog pristupa odlučila je da preskoči turnir u Čarlstonu, dok bi u nastavku sezone mogla da nastupi u Madridu i Rimu, kao i na Rolan Garosu.

U međuvremenu, Talija Gibson nastavlja takmičenje i u narednoj rundi će igrati protiv Ive Jović.