Alanis Moriset tuži bivšu menadžerku zbog ucjene

Alanis Moriset tuži bivšu menadžerku turneje Keren Urinov zbog prevare i iznude. Pjevačica u novoj tužbi tvrdi da joj je Urinov prijetila da će je lažno prijaviti za trgovinu drogom ukoliko joj ne isplati 'otkupninu pod prijetnjom'. Moriset navodi da je bila žrtva 'pomno osmišljene kampanje ucjene' koju je, kako tvrdi, organizovala muzička menadžerka Urinov.

U tužbi, do koje je došao Billboard, navodi se da je Urinov obećala da neće realizovati neosnovane prijetnje pod uslovom da bude angažovana kao direktorka turneje na period od 15 godina. 'Moriset neće pristati da narednih 15 godina radi sa nesposobnom ucjenjivačicom, niti će joj pod prijetnjom plaćati otkupninu. Nije imala drugog izbora osim da je tuži', navodi se u tužbi.

Urinov, koja je devet godina bila na čelu izraelskih operacija kompanije 'Live Nation', angažovana je 2025. godine da vodi Morisetinu turneju tokom tog ljeta. Problemi su navodno počeli u julu 2025. godine, kada je, prema tvrdnjama iz tužbe, Urinov na aerodromu u Velikoj Britaniji ispitivana zbog prenošenja torbe u kojoj su se nalazili marihuana i ksilazin.

Prema navodima iz tužbe, Urinov je nakon završetka turneje poslala Alanis 'niz sve zahtjevnijih pisama', u kojima je navodno prijetila da će britanskim vlastima reći da droga pripada pjevačici, ukoliko joj ne ponudi 15-godišnji ugovor za posao direktorke turneje sa 'ogromnom novčanom naknadom'. 'Moriset nije zainteresovana da zaposli Urinov na 15 godina, ne samo zato što je ucjenjivačica, već i zato što je bila užasan menadžer turneje 2025. godine', navodi se u tužbi.