Kit Ričards: Amerika je trenutno pomalo razočaravajuća

Gitarista grupe Rolingstons, Kit Ričards, ocijenio je da je Amerika danas pomalo razočaravajuća, osvrćući se na aktuelnu političku klimu i društvene podjele u Sjedinjenim Američkim Državama. Ričards, koji od 1985. godine živi u saveznoj državi Konektikat, govorio je za Sandej Tajms povodom izlaska novog albuma grupe 'Foreign Tongues', koji će biti objavljen 10. jula.

Tom prilikom komentarisao je spekulacije da je pjesma 'Ringing Hollow' usmjerena protiv američkog predsjednika Donalda Trampa. Iako nije želio da potvrdi da se pjesma direktno odnosi na Trampa, Ričards je rekao da govori o 'nostalgičnoj ljubavnoj vezi s Amerikom, koja je trenutno pomalo razočaravajuća'. U šaljivom tonu dodao je da je 'stavio čelični šljem i živi u bunkeru', aludirajući na moguće reakcije na njegove stavove.

Istakao je i da među ljudima oko sebe primjećuje sve veću zabrinutost zbog finansijskih problema. 'Sve što čujete jeste žaljenje zbog cijene goriva. Tu ljude najviše boli', rekao je Ričards. Pjevač benda Mik Džeger u odvojenom intervjuu za MOJO kazao je da pjesma 'Ringing Hollow' nije isključivo posvećena Trampovoj Americi, već govori o Americi u širem smislu i ličnim iskustvima članova benda.

'Američki san i dalje postoji za neke ljude i siguran sam da možemo pronaći divne priče o imigrantima iz posljednjih godinu dana. Ali istovremeno čitamo o slabljenju američke imperije. Situacija nije ista kao nekada, ali se postavljaju brojna pitanja o imperijalnom širenju i sistemu lobiranja', rekao je Džeger.