Azijske države pojačale kontrole na aerodromima zbog Nipa virusa

Azijske države su uvele kontrole na aerodromima nakon što je Indija potvrdila slučajeve smrtonosnog Nipa virusa u državi Zapadni Bengal. Crveni alarm je aktiviran na aerodromima širom Azije, uključujući Tajland, Nepal, Vijetnam, Kinu i Majnmar.

Putnici koji dolaze iz Indije prolaze kroz medicinski skrining zbog straha od širenja epidemije Nipa virusa, koji se može prenijeti sa čovjeka na čovjeka, a ima izuzetno visoku smrtnost. Indijski ministar zdravlja je potvrdio dva slučaja Nipa virusa u Zapadnom Bengalu, naglašavajući da su vlasti uspjele da “blagovremeno obuzdaju virus”. Više detalja o zaraženima nije iznijeto, ali je rečeno da je skoro 200 kontakata testirano i smješteno u karantinu.

Nipa virus se prenosi prvenstveno sa životinja, najčešće svinja i voćnih slijepih miševa, direktnim kontaktom ili putem tjelesnih izlučevina. Period inkubacije može trajati do 14 dana, a prvi simptomi uključuju visoku temperaturu, mučninu, povraćanje i respiratorne probleme koji mogu dovesti do upale pluća. U težim slučajevima može doći do otoka mozga, encefalitisa, meningitisa i niza neuroloških simptoma, kao što su pospanost ili napadi.

Svjetska zdravstvena organizacija ističe visok rizik od izbijanja epidemije, s obzirom na to da za virus ne postoji vakcina. Smrtnost varira između 40 i 75 odsto, a preživjeli često trpe ozbiljne posljedice, uključujući trajne napade i promjene ličnosti. Nipa virus je prvi put otkriven 1998. godine u Maleziji na farmi svinja, kada je u epidemiji umrlo više od 100 ljudi, a tokom borbe za suzbijanje zaraze ubijeno je milion svinja.