Široki u ABA ligu nakon pobjede nad TFT-om

Široki je nakon pobjede u prvom meču savladao TFT u Sjevernoj Makedoniji rezultatom 87:86, čime je izborio plasman u najviši regionalni rang. Ovaj rasplet znači da je Borac iz Čačka dobio rivala u baražu za opstanak, pošto će se boriti upravo protiv TFT-a.

Utakmica u Skoplju počela je prekidom, jer su domaći navijači ubacili papirne trake na teren. Parket je brzo očišćen, a nastavak je donio nervozno otvaranje, puno grešaka i igru u kojoj se odmah vidjelo koliki je ulog. TFT je bolje ušao u meč, a domaći su preko Darina Govensa i Džastina Gordona došli do prednosti 23:16 u finišu prve četvrtine. Međutim, Široki je trojkom Josipa Bilinovca smanjio zaostatak, pa je nakon prvih deset minuta bilo 25:21.

Ekipa Marijana Bagarića u drugoj četvrtini nije imala koš iz igre više od četiri minuta, ali je sjajni Mitrik Trajs pogađao sa distance i sprečavao TFT da napravi ozbiljniju razliku. Domaćin je igrao pametnije i uravnoteženije u napadu, pa je na poluvremenu imao 43:35. Široki se vratio početkom treće četvrtine. Poenima Trajsa, Džejlina Mekririja i Mihe Škedelja gosti su brzo prišli na 46:45, ali je TFT odgovorio tranzicijom i preciznim šutem, ponovo se odvojivši na 56:47.

Pred posljednjih deset minuta domaći su imali pet dvocifrenih igrača, dok je kod Širokog Trajs bio ubjedljivo najraspoloženiji sa 27 poena. Trojka Dominika Vujanovića u posljednjoj sekundi treće četvrtine vratila je goste na samo dva poena minusa, 61:59. Posljednja dionica donijela je pravu dramu. Nijedan tim nije uspijevao da se odvoji, a Vujanović je nešto više od minut prije kraja pogodio tešku trojku u padu za vođstvo Širokog 85:80.

TFT se nije predao. Gordon je prvo pogodio dva bacanja, zatim je Vujanović izgubio loptu poslije presinga domaćih, a nakon nesportske lične greške Viktor Tašovski je sa linije penala smanjio na 85:84. Lopta je ostala TFT-u, a Govens je teškim šutem sa poludistance donio domaćinu prednost 86:85. Ipak, posljednju veliku riječ imao je Trajs, koji je u izolaciji, poslije preuzimanja, pogodio sa poludistance za 87:86 i ostavio TFT-u četiri sekunde za napad odluke.

Domaći su posljednji napad crtali za Govensa, ali je na kraju Gordon morao da uzme težak šut preko ruke, koji nije bio blizu cilja. Široki je tako mogao da počne slavlje i potvrdi veliki plasman. Trajs je bio junak pobjede sa 32 poena, a na terenu je proveo svih 40 minuta. Odličan je bio i Matej Bošnjak, koji je upisao dabl-dabl učinak od 15 poena i 10 skokova. TFT je predvodio Darin Govens sa 25 poena, četiri skoka i osam asistencija, dok su Stenli Dejvis i Viktor Tašovski dodali 19 i 18 poena.