Sosijedad osvojio Kupu kralja nakon dramatičnog finala protiv Atletika

Sosijedad je osvajač španskog Kupa kralja za sezonu 2025/26. Tim iz San Sebastijana je nakon velike drame u finalu savladao Atletiko Madrid – odlučivali su penali nakon rezultata 2:2 u 120 minuta borbe.

Junak Baskijaca je golman Unai Marero koji je u prve dvije serije zaustavljao šuteve Aleksandera Serlota i Hulijana Alvaresa, dok je tačku na pobjedu u petoj seriji stavio Pablo Marin. Sosijedadu je ovo četvrti pehar u Kupu kralja.

“Plavo-bijeli” su dva puta vodili u regularnom dijelu – golovi Berenčee i Ojarzabala iz penala, a Atletiko je pronalazio način da se vrati. Prvo izjednačenje mu je donio Ademola Lukman, a drugo – u 83. minutu – Alvares. Sve su rješavali penali, a više sreće i umijeća je imao Sosijedad koji se u ovom takmičenju radovao i 1909, 1987. i 2020.