Simonović: Ovo je tek prvi korak nakon pobjede nad Slobodom

Trener Sutjeske, Marko Simonović, pohvalio je izdanje svog tima nakon pobjede nad KK Sloboda i zahvalio se svim navijačima koji su došli da ih bodre sa tribina. “Očekivano teška utakmica, Sloboda je odlična ekipa, imaju odličnog trenera, znaju da igraju košarku. Njihovi igrači su iskusni, igraju na nivou iznad i možda koštaju na papiru ispred naših igrača. Bila je kvalitetna utakmica, ljudi su imali šta da vide. Zahvalio bih se navijačima i svima koji su došli, dali su nam vjetar u leđa kada se utakmica lomila”, rekao je Simonović.

On je dodao da je očekivao nervozu, posebno u prvom poluvremenu, ali da su igrači pokazali sjajan karakter i zasluženo pobijedili. “Ovo je tek prvi korak, imamo još jedan do polufinala”, istakao je Simonović.

Strateg tima Slobode, Marko Trbić, smatra da je presudan bio loš skok u odbrani njegovih igrača. “Čestitam Sutjesci na pobjedi. Utakmicu je odlučila jako agresivna igra vanjske linije Sutjeske na našim igračima. Sutjeska je imala i 15 skokova u napadu i to je presudilo”, rekao je Trbić, dodajući da je Filip Barović bio ključni igrač utakmice.

Druga i potencijalno odlučujuća utakmica je na programu naredne srijede, 25. marta.