Osmajić postigao gol, ali Preston poražen od Oksford junajteda

Milutin Osmajić se nakon gotovo mjesec dana ponovo upisao u listu strijelaca, ali njegov tim Preston nije uspio da izbjegne poraz od Oksford junajteda rezultatom 3:1 u 36. kolu Čempionšipa.

Utakmica je počela loše po Preston, jer je Oksford već u petom minutu poveo. Mihal Helik je primirio dugu loptu Kamerona Branagana i poslao je u mrežu. Ipak, Preston je brzo odgovorio, a u 12. minutu Bendžamin Vajtman je centrirao, a Osmajić preciznim udarcem matirao golmana gostiju za 1:1. Ovo je Osmajiću bio sedmi gol u 20 utakmica u Čempionšipu, dok je osmi ukupno u sezoni.

Nažalost po Preston, domaći tim nije izdržao pritisak u drugom poluvremenu. U 55. minutu Stanli Mils je šutirao sa više od 20 metara, a lopta je zakačila Vila Lankšira i završila u mreži, donoseći Oksfordu prednost. Samo šest minuta kasnije, Kiaron Braun je poslao Oksford ponovo na plus dva, nakon što je Helik iz auta ubacio loptu u peterac. Osmajić je odigrao cijelu utakmicu, dok je Andrija Vukčević ušao sa klupe u 62. minutu. Ovim porazom, Preston je zabilježio peti uzastopni poraz u Čempionšipu.