Amerikanci osvojili zlato u hokeju na Zimskim olimpijskim igrama nakon 46 godina čekanja!

Reprezentacija Sjedinjenih Američkih Država osvojila je zlatnu medalju u hokeju na ledu na Zimskim olimpijskim igrama, prekinuvši čekanje koje je trajalo još od čuvenog “čuda na ledu” iz Lejk Plesida 1980. godine. U spektakularnom finalu, Amerikanci su savladali najvećeg rivala Kanadu rezultatom 2:1, a odluka je pala u produžetku.

Junak pobjede bio je Džek Hjuz, koji je pogodio nakon samo minut i 41 sekunde igre u formatu tri na tri. Amerikanci su poveli već u ranoj fazi meča kada je Metju Boldi, poslije sjajne solo akcije i efektnog bekhend poteza, zatresao mrežu. Kanada je do izjednačenja stigla pred kraj druge trećine, golom Kejla Makara, koji je snažnim udarcem sa distance savladao golmana SAD.

Kanađani su u posljednjem periodu imali više prilika i inicijativu, ali nisu uspjeli da pronađu put do drugog gola, pa je meč otišao u produžetak. Tamo je Hjuz donio pobjedu i zlato Americi, dok je najbolji hokejaš današnjice, Konor Mekdejvid, ostao bez olimpijskog trofeja.