Brentford zaustavio lidera, Siti na minus četiri u Premijer ligi

Trka za titulu u Premijer ligi je otvorena, nakon što je Arsenal igrao 1:1 na gostovanju Brentfordu. Siti je tako na 12 kola prije kraja prišao 'tobdžijama' na četiri boda.

U prvom dijelu je bilo prilika na obje strane, ali mreže se nisu tresle. Arsenal je poveo u 61. minutu kada je Noni Madueke sjajno reagovao nakon centaršuta sa lijeve strane. Međutim, radost lidera nije dugo trajala. U 71. minutu Luis Poter je vratio stvari na početak i najavio uzbudljiv finiš. On je sa druge stative poslao loptu u mrežu, nakon dugog auta Majkla Kajodea i produžetka glavom Sepa van den Berga.

Do kraja su viđene četiri velike šanse, od kojih je tri imao domaćin. Moskera i Rajs su intervenisali u posljednjem trenutku, dok je Tijago iz izgledne pozicije šutirao preko prečke. Na drugoj strani, golman Brentforda je odbranio udarac Martinelija u situaciji jedan na jedan. Tako je ostalo 1:1.

Brentford je na sedmom mjestu sa 40 bodova i kandidat je za izlazak na evropsku scenu.