Atalanta nadigrala Juventus i izborila polufinale Kupa Italije

Atalanta je nadigrala Juventus u Bergamu rezultatom 3:0 i izborila plasman u polufinale Kupa Italije. Crnogorski napadač Nikola Krstović igrao je u posljednjih 15 minuta meča i upisao asistenciju.

Nakon što je Atalanta povela u 27. minutu iz penala, Suleamana je povisio na 2:0 u 77. minutu, nakon ubacivanja Belanove. Krstović je kod trećeg gola proigrao Pašalića, koji je preciznim udarcem sa 13-14 metara postavio konačan rezultat u 85. minutu.

Naš drugi reprezentativac Vasilije Adžić odgledao je još jedan meč sa klupe Juventusa. Atalanta je tako izborila polufinale četvrti put u posljednjih sedam godina, a za finale će se tim Rafaela Paladina boriti sa boljim iz okršaja Bolonja - Lacio. Trofej kupa brani upravo Bolonja, koja je prošle sezone u finalu u Rimu pobijedila Milan rezultatom 1:0.