Filip Kunčer zauzeo 5. mjesto u Italiji

Crnogorski automobilista Filip Kunčer zauzeo je peto mjesto na stazi Muđelo u Italiji, na trci koja je vožena u okviru Reno Klio kupa. Prema pravilima, trka traje 25 minuta plus jedan krug.

Kunčer je krenuo sa 11. mjesta, ali je dobro startovao, pa je nakon prvog kruga popravio svoj plasman za dvije pozicije. Na kratko je našeg automobilistu obišao Tošić, ali ga to nije poremetilo. Poslije nekoliko minuta trke, Filip se vratio na 9. mjesto, a zatim obišao Đakoma. Ni tu se nije zaustavio, pa je pretekao i Geina u borbi za 7. mjesto.

Nastavio je naš takmičar sa sjajnom vožnjom i nakon toga, pa na njegov napad odgovor nije imao ni Polderman. Do kraja trke je ostalo pet minuta i jedan krug, ali Kunčer se više nije pomjerao sa 6. mjesta. Međutim, poslije je Finkelštajn kažnjen, pa se Filip popeo za još jednu poziciju.

U Muđelu se sjutra vozi još jedna trka, sa početkom u 15 časova, uz prenos na RTCG.