Djeca htjela da se okorise od viteza Bekama

Fudbalska legenda Dejvid Bekam otkrio je zanimljivu porodičnu anegdotu nakon što je dobio vitešku titulu, priznajući da su ga djeca odmah pitala – da li će imati neke posebne privilegije.

Bekam, koji je proglašen vitezom od kralja Čarlsa III tokom ceremonije 4. novembra 2025. godine, rekao je da se u njegovom svakodnevnom životu nije mnogo toga promijenilo. “Djeca su me pitala: ‘Tata, da li sada imamo neke privilegije’. Rekao sam im: ‘Osim onih koje već imate – apsolutno ne’. Bili su iznenađeni”, našalio se Bekam tokom intervjua za talkSPORT.

Bekam i njegova supruga Viktorija Bekam imaju četvoro djece: Bruklina, Romea, Kruza i Harper, koji su, kako kaže, sa velikim interesovanjem pratili njegovu novu titulu. Ipak, bivši fudbaler naglašava da titula nije donijela nikakve konkretne benefite u svakodnevnom životu, osim jedne sitnice. “Jedino što se promijenilo je papir za pisma zahvalnosti”, našalio se.

Bekam nije krio emocije kada je govorio o samoj ceremoniji. “To je bio nevjerovatan dan. Vjerovatno jedan od najboljih u mom životu, odmah nakon rođenja djece i vjenčanja”, rekao je. Titula viteza dodijeljena mu je za doprinos sportu i humanitarnom radu, čime je i zvanično postao “Ser Dejvid Bekam”. Ceremoniji su prisustvovali i njegovi roditelji, kao i supruga Viktorija, više od decenije nakon što je prvi put predložen za ovu čast – još 2011. godine.

Bekam je priznao da je cijelo iskustvo bilo veoma emotivno. “Nisam bio nervozan, samo emotivan. Ovo znači mnogo meni i mojoj porodici”, pojasnio je.

Nakon što je dobio vitešku titulu, Bekam je najavio i nove projekte. “Želim da inspirišem ljude da provode više vremena u prirodi i probaju nešto novo”, poručio je.