Kvinta Branson o Beti Bup filmu

Kreatorka serije "Abbott Elementary", Kvinta Branson, razvijaće i glumiće u novom filmu zasnovanom na legendarnom crtanom liku Beti Bup (Betty Boop). Kompanija Bransonove, "Fifth Chance Productions", udružiće snage sa "Fleischer Studios" i Markom Flišerom, unukom kreatora Beti Bup, Maksa Flišera.

Prema izvještaju Variety, film će pratiti model filma "Barbie" iz 2023. godine, reinterpretirajući poznati ženski lik kroz savremenu perspektivu. U tekstu Variety portala se navodi da će „film pratiti porijeklo i razvoj Beti Bup kroz perspektivu njenog tvorca, Maksa Flišera, istražujući odnos između umjetnika i njegovog stvaralaštva dok se suočava sa kreativnim i komercijalnim pritiscima izgradnje jedne od prvih svjetskih animiranih ikona.“ Više detalja za sada nije objavljeno.

Nastala 1930. godine, Beti Bup bila je crtana interpretacija subkulture „Flapper Girl“ iz 1920-ih - tinejdžerka sa dječjim glasom i prepoznatljivom uzrečicom: "Boop-Boop-Be-Doop". Pojavljivala se u brojnim filmovima i stripovima tokom 1930-ih, postala kulturna ikona i decenijama bila prisutna u medijima i proizvodima različite vrste. Imala je i kratko pojavljivanje u Oskarom nagrađenom filmu "Who Framed Roger Rabbit?", dok je prošle godine otvoren i brodvejski mjuzikl zasnovan na tom liku.

Bransonova, koja je kreatorka, scenaristkinja i glavna glumica serije "Abbott Elementary", rekla je u saopštenju: „Beti Bup je jedan od najomiljenijih crtanih likova naše zemlje. Gotovo cijeli vijek imala je tih, ali neosporan uticaj na kulturu. Nakon što smo Erin (Vehrenberg) i ja razgovarale sa Markom i saznale više o tome kako je njegov djed stvorio Beti, shvatila sam da postoji mnogo dublja priča koju treba ispričati. Priča koja može biti istražena na način koji djeluje svježe, subverzivno i vanvremenski - baš kao i sama Beti“.