Bjelopoljcu zadržavanje zbog prijetnji partnerki i vandalizma

Bjelopoljsko Osnovno državno tužilaštvo odredilo je zadržavanje muškarcu B.L. iz Bjelog Polja zbog sumnje da je u alkoholisanom stanju prijetio svojoj vanbračnoj supruzi, lomio po stanu i slao joj prijeteće poruke. Prema navodima tužilaštva, incident se desio juče oko 14 sati i 30 minuta, kada je osumnjičeni, pred maloljetnim djetetom, ugrozio sigurnost svoje partnerke.

Iz tužilaštva su istakli da se B.L. drsko i bezobzirno ponašao prema svojoj partnerki, upućujući joj psovke, a zatim fizički oštetio imovinu. On je pesnicom polomio staklo na balkonskim vratima i prozoru dnevnog boravka, a nogom i rukom udario u vrata od kupatila. Kada je žrtva pozvala policiju, osumnjičeni joj je uputio prijetnje: „Zovi ih slobodno, ubiću te ja i pored njih“, nakon čega je napustio stan. Nakon toga, putem telefona, poslao joj je više prijetećih poruka. Državni tužilac je nakon saslušanja osumnjičenog donio rješenje o zadržavanju B.L. u trajanju do 72 časa.